skólagleði

Ég er búin að sakna þess svo mikið að vera í skóla og að glósa að ég hef hafið lestur á bókinni Veganesti og tek nú niður hnitmiðaða punkta í gríð og erg. Þessi bók er uppfull af skemmtilegum upplýsingum um næringu barna svo að strákarnir verða mun hraustari í ár. Bókin gefur einnig afbragðs ráð til að fá litla kúta til að smakka nýjar matartegundir þannig ég sé fram á að strákarnir eigi eftir að geta torgað bæði hrossabjúgum með bestu lyst.

Fyrsti tíminn í Fashion Marketing var í dag og ég var svo heppin að fá að vera fyrst til að kynna mig og segja svolítið frá mér. Nú ég byrjaði bara á bernsku árunum og hægt og rólega þræddi ég samnemendur mína í gegnum æsku árin og þau erfiðu ár sem unglingsárin geta verið, því næst fór ég snögglega í gegnum sjúkrasöguna mína og sagði frá helstu afrekum mínum á vinnumarkaðinum.
Restin af tímanum gekk bara alveg ljómandi vel og gat ég tekið þátt í lifandi umræðu og hent inn nokkrum góðum punktum. Ég sé nú fram á að ég verði hrókur alls fagnaðar í næstu tímum.

Ég og Þórdís gerðum okkur aldeilis glaðan dag síðastliðinn laugardag og skottuðumst um London þvert og endilanga. Við byrjuðum í Beyglu á London Bridge og rúlluðum síðan afvelta niður að Tower Bridge í þeirri von um að komast upp á brúnna. Veðrið var nú ekki alveg að leika við okkur og hann blés svona all hressilega úr norð austri. Okkur leist nú ekki mikið á það að húka uppi á brúnni í þessu roki svo við rúlluðum niður í Buckingham palace og heilsuðum uppá gömlu. Þessi túristarúntur okkar var allur festur á svokallaða stafræna myndavél gestum og gangandi til mikillar gleði.

 

 

XOXO
LOVE TYRA

STATUS UPDATE: Það er komið gat á Janus gallann!!!!!!

Athugasemdir

[Hugrún (IP-tala skráð) 18.1.2011 kl. 22:43]

Okey HVERNIG fórstu að því að setja gat á janus gallan ??! Getur ekki bara verið að þú hafir keypt janus eftirlíkingu eða eitthvað... eitt er allaveganna víst að ég er búin að eiga sama rauða settið síðan ég var 14 ára og það sér ekki á því ! Nú erum við að tala um stöðuga notkun síðan ég flutti til Þýskalands, en það er enn eins og nýtt! Ég myndi hringja og kvarta!

p.s. Anna og Eygló ætla að koma kannski fyrri part apríl, ertu laus þá líka og við getum haldið janusarpartý á Schedelstraße neun?!

[Ellen (IP-tala skráð) 19.1.2011 kl. 09:59]

Ég táraðist af hlátri... þú ert svo mikið yndi. Reyni að ná þér á skype í kvöld og fá að vita ALLT um fyrsta tímann